ناقابل فراموش: 16 مئی 1999،اتوار کی صبح تھی،معمول کے مطابق زندگی رواں دواں تھی

جھنگ(نیوز ڈیسک) آٹھارہ ہزاری سانحہ روڈو سلطان: 26 برس بعد بھی درد تازہ ہے
16 مئی 1999، ایک اتوار کی صبح تھی۔ جھنگ کے نواحی علاقے روڈو سلطان میں معمول کے مطابق زندگی رواں دواں تھی۔ بازار کھل رہے تھے، دوکاندار سامان سجا رہے تھے، اور چونکہ اسکولوں میں چھٹی تھی، بچے گلی محلوں میں کھیل رہے تھے۔ کسی کو کیا خبر تھی کہ یہ صبح ان کی زندگی کی آخری صبح ثابت ہوگی۔

اسی اثنا میں ایک تیز رفتار آئل ٹینکر، گدھا گاڑی کو بچانے کی کوشش میں بے قابو ہو کر الٹ گیا۔ زمین پر تیل بہنے لگا، اور جلد ہی آس پاس کے لوگ، تجسس، غربت یا لاعلمی کی وجہ سے برتن لے کر تیل جمع کرنے پہنچ گئے۔ کچھ بچے کھیلتے کھیلتے وہاں جا پہنچے، کچھ راہگیر بھی رک کر منظر دیکھنے لگے۔

ابھی یہ ہجوم متفرق سوچوں میں مصروف ہی تھا کہ اچانک ایک زور دار دھماکہ ہوا۔ شاید کسی کی سگریٹ یا چنگاری نے اس پھیلتے ہوئے تیل کو آگ دکھا دی۔ لمحوں میں پورا منظر قیامت کا منظر بن گیا۔ آگ کے شعلے بلند ہونے لگے، چیخ و پکار سنائی دی، لوگ جان بچانے کے لیے دوڑنے لگے، لیکن آگ کی لپیٹ نے کسی کو موقع نہ دیا۔ کچھ لوگ تو موقع پر ہی جھلس کر جاں بحق ہو گئے، کچھ نے اسپتال جاتے ہوئے دم توڑا۔

اس المناک حادثے میں سو سے زائد افراد شہید ہوئے۔ کئی خاندانوں کے چراغ گل ہو گئے، کئی ماؤں کی گودیں اجڑ گئیں، کئی بچے یتیم اور والدین بے اولاد ہو گئے۔ پورا علاقہ سوگ میں ڈوب گیا۔ نہ صرف جھنگ بلکہ پورے ملک میں اس سانحے کی گونج سنائی دی۔

آج 26 سال گزر جانے کے بعد بھی روڈو سلطان کے مکین اس دن کو بھلا نہیں سکے۔ ہر سال 16 مئی کو جب سورج طلوع ہوتا ہے تو وہی صبح، وہی منظر، وہی قیامت کی یاد پھر سے تازہ ہو جاتی ہے۔ مقامی لوگ شہدا کے لیے دعائیں کرتے ہیں، قرآن خوانی کا اہتمام کیا جاتا ہے اور اس دردناک واقعے کو نسلِ نو تک پہنچایا جاتا ہے تاکہ وہ سمجھ سکیں کہ بے احتیاطی، لاعلمی اور لالچ کس طرح اجتماعی سانحات کا سبب بن سکتے ہیں۔

یہ سانحہ صرف ایک حادثہ نہیں، بلکہ ایک سبق ہے۔ ایک چیخ ہے جو آج بھی ہمیں جھنجھوڑتی ہے کہ ہمیں اپنی سڑکوں پر ٹریفک کے نظام کو بہتر بنانا ہوگا، عوام میں شعور اجاگر کرنا ہوگا، اور حادثات کے بعد رش کرنے کی بجائے احتیاط اور دوری اختیار کرنی ہوگی۔

اللہ رب العزت ان تمام شہداء کے درجات بلند فرمائے، ان کے اہل خانہ کو صبر جمیل عطا فرمائے، اور ہمیں ایسے سانحات سے سبق سیکھنے کی توفیق عطا فرمائے آمین ثمہ آمین یا رب العالمین